شموع اللّيل

كتير كنَّا ننام                            

بِوِنسةِ حَبايِبنا

وكتير صِرنا أيتَام                        

بِفِقدِة  قَرايبنا

يا رَيت عادِ العُمر يرجَع              

وتِرجَع وجُوه ديرِتَنا  

بسِ العُمر ما بِيرجَع                   

وما بِترجَع وُجوه حَبِّتنا

آه يَمِّي، شو كانِ القَمَر يِسهَر عَ سَهرِتِنا

وشو دُموعِ اللَّيل تِبكي عَ مخدِّتنا

كِنتِ القَمَر يمِّي

وكِنتِ شُموعِ اللَّيل بِجَمعِتنا

يا رَيت يّمِّي الحِلم مرّة      

بِيرِدِّك ولو مَرَّة

لَكِنت أفرُش رُموشِ العَين

وقدِّملِك تِبرِ القَلب جّرَّة

آه يمِّي، بِيِبقَى حِلمِ بعيد بِسَما بِعِيدي

يا رّيت يَمّي كان يِطلَع بِإيدي فِكِّ العُقَد

وإفتَح بْواب مَوصودي

لَكِنتِ لَقَيتيني عَ بَوابِ العِيد عَم بُوس إيدَيكي

وقِلِّك كِل عام وإنتِ بأَلف خير

يا أجمَل سما وأجملِ هدِيِّة

مِتلِ الحِلِم بِلَيل عَتمي    

 بِتِمرُق صورتِك يمِّي

ما بِتغِيب إدَّامي بشوفا  

 بلَمسي                          

 بهَمسي                       

 بنسمي                       

 بغَيمي                        

 بنَجمي

صُورتِك عَمِ تعِيد سنين

وقَدَر سَرَق مِنها أحلى سِنين

وتَرَك خَلفو حجَارِ البَيت   

 تِبكي عَ فِرقِتها                             

 تِضحَك  لَضِحكِتها                             

 تِئْنَس بِمواويل                               

كَانَت ملايكي تُقعُد بِحَوقِتها

ما أحلى حَكايات إمِّي وقُصَصها!  

فِيها رِيحةِ الضَّيعَة العتيقة                                                 

والقلوبِ الرَّقيقة                                                

والصّديقَة

ما أحلى حَكايات إمِّي وقُصَصها! فِيها الدَّفا                                            

والعَفا                                          

والغَفا عَ رِكبِتها                                          

وألِف إيد رَحمان كانو يِنزَلو بِساحِتها

اللّه يرحَمِك يمِّي    

شو كان صَوتِك يزيل همِّي

وشَوفتِك شَمس يَومي

ودَعوتِك بَعِدها عَ كِل دَرِب إدّامي، اليَوم بِتسَمِّي

الله يرحَمِك 

ويطَيِّبِ ترابِك يا إمِّي